Tailand qirolligi turizm va sport vaziri Kobkarn Vattanavrangkul hamda “O‘zbekturizm” milliy kompaniyasi raisi Farrux Rizayev Toshkentda ikki davlatning turizm sohasidagi hamkorligi haqidagi kelishuvni imzoladi. Vazirning tashrifi Tailand sherik-davlat bo‘lgan Toshkent xalqaro sayyohlik yarmarkasi doirasida bo‘lib o‘tdi. Bu haqda “Gazeta.uz” xabar bermoqda.
“Kelishuvdan maqsad — o‘zaro sayyohlar almashinuvini ko‘paytirishdan iborat”, — deya mazkur hujjat imzolanishini izohladi Kobkarn Vattanavrangkul.
Vazirning bildirishicha, o‘tgan yili Tailandga O‘zbekistondan 15,6 ming atrofida sayyoh borgan bo‘lsa, Tailanddan O‘zbekistonga 383 nafar mehmon keldi. O‘zbekiston o‘tgan yili Tailandga sayyohlik oqimini oshirgan (2014-yilga nisbatan 20 foiz) MDHdagi yagona davlat bo‘ldi: Rossiyada bu ko‘rsatkich 45, Qozog‘iston, Ukraina va Belarusda esa 20 foizga pasaydi.
Uchrashuvda vazir mamlakat haqida hujjatli film olish uchun O‘zbekistonga tasvirga olish guruhini jo‘natish, Tailand sayyohlik hamjamiyatida “Buyuk Ipak yo‘li” brendini ilgari surishni boshlashni taklif etdi. Shuningdek, tomonlarning sayyohlik ko‘rgazmalarida keng ishtirok etishi, ikki davlat sayyohlik salohiyatini yanada ommalashtirish uchun soha vakillari va jurnalistlarning safarlarini tashkillash masalalari muhokama etildi.
Izoh (0)