Ularning ham yashashga, hayot zavqini his qilishga haqlari bor edi. Afsuski, ular qotillik qurboni bo‘lib, hayotni juda erta tark etishdi. Quyida o‘zbek sanʼati, madaniyati va sportiga hissa qo‘shgan ana shunday taqdir egalarining o‘limiga nima sabab bo‘lganini xotirlaymiz.

Turmush o‘rtog‘i qo‘lida jon bergan aktrisa

Bugungi tomoshabinlar aktrisa Tursunoy Saidazimovani tanimasligi mumkin. Ammo u o‘z davrining eng yetakchi ijodkorlaridan biri bo‘lgan. U 17 yil umr ko‘rgan va turmush o‘rtog‘i tomonidan vahshiyona o‘ldirilgan.

Aktrisa 1911-yil Toshkentda tug‘ilgan. Taqdir taqozosi bilan uning hayoti fojiali yakun topgan. 1928-yilning 10-mayida 17 yoshida Buxorodagi gastrol safari chog‘ida turmush o‘rtog‘i tomonidan vahshiyona o‘ldiriladi. Aktrisaning fojiali o‘limi sanʼat ahlining qalbini larzaga keltirgan.

O‘zbekiston xalq artisti Muhiddin Qori Yoqubov Tursunoy o‘ldirilganda shunday degan ekan: “Dushmanlar qo‘yishmayapti. Mayli, bitta shahid ketgan Tursunoyning o‘rniga yuztasini tayyorlayman”. Hamza Hakimzoda Niyoziy esa unga atab “Tursunoy marsiyasi”ni yaratgan.

Ayanchli qotillik qurboni bo‘lgan Laylo

Xonanda Laylo Aliyeva 1998-yil 1-may kuni 23 yoshida mashhur hamkasblari qotilligining qurboni bo‘lgan.

1990-yillarning o‘zbek tinglovchilari uchun megayulduz hisoblangan Laylo Aliyeva ikki yasharligidan sanʼatning moda yo‘nalishiga kirib kelgan. O‘n yoshida go‘zallik tanlovlarida g‘olib bo‘lgan. Qo‘shiq kuylab, kliplarda ko‘rinish berib, omma eʼtiboriga tushgan hamda minglab muxlislar orttirgan. Bobosi zargar bo‘lgani tufayli Laylo ham bolaligidan tilla taqinchoqlarni yaxshi ko‘rgan. Layloning o‘ldirilishiga ham shu tillalar sabab bo‘lgan. O‘sha vaqtlarda mashhur bo‘lgan “Al-Vakil” guruhidagi ikki qo‘shiqchi yigit 1998-yilning 1-mayida Layloning uyiga go‘yo mehmon bo‘lib kelgan. Laylo ularni tanigani uchun yarim tun bo‘lishiga qaramay uyiga kiritgan. Biroz suhbatlashib o‘tirgach, yigitlar Layloga hujum qilgan va 42 joyidan vahshiylarcha pichoqlab tashlashgan. Qotillar uning barcha tilla taqinchoqlarini, hatto barmog‘idan chiqishi qiyin bo‘lgan uzugini sovun surkab sug‘urib olishgan.

Qotillar qo‘lga olinib, qamoq jazosiga hukm qilingan. Layloni dafn etishgach, og‘ir musibatni ko‘tarolmay, otasi ham bir oydan keyin vafot etgan. Laylo Aliyevadan yolg‘iz o‘g‘li Jasurbek yodgor bo‘lib qolgan.

Rejissyor qotili bo‘lgan mardikor yigitlar

Skan-Multi taxallusi bilan tomoshabinlarga yaxshi tanish Iskandar Aʼzamov 2006-yilda 28 yoshida o‘zining uyida ikki nafar yigit tomonidan shafqatsizlarcha pichoqlab o‘ldirilgan.

Iskandar Aʼzamov 1978-yil 25-yanvarda tug‘ilgan bo‘lib, u kinorejissyor, ssenariynavis va aktyor sifatida ijod qilgan. O‘zbek televideniyesidagi faoliyati 1996-yilda boshlangan. O‘n bir yillik ijodi davomida yuzlab musiqiy videokliplarni suratga olgan. 2003-yil Moskvada, “STS” kanalida postanovkachi operator bo‘lib ishlagan. U “Xo‘ja Nasriddin: o‘yin boshlanadi” nomli badiiy filmni suratga oladi. Unda asosiy rollarni ijodkorning o‘zi va qo‘shiqchi Sug‘diyona o‘ynagan. Ammo unga o‘z filmining premyerasida qatnashish nasib qilmadi.

Skan-Multi 2006-yilning 23-iyun kuni o‘z uyida ikki nafar yigit tomonidan shafqatsizlarcha pichoqlab o‘ldirilgan. Maʼlumotlarga ko‘ra, marhumning xizmatini ado etib yurgan mardikor yigitlar Iskandar Aʼzamovning orqasiga va yuragiga bir necha marta pichoq urgan. Qotillarning sanʼatkorni o‘ldirishdan maqsadi pul bo‘lgan. Jinoyatchilar ushlanib, ularga qilmishiga yarasha jazo tayinlangan.

Qotillar ichida o‘z o‘g‘li ham bor

Taniqli suxandon Rahmatilla Mirzayev 2015-yilning 2-mart kuni o‘z uyida o‘ldirib ketilgan. Eng ayanchlisi qotillar orasida o‘z o‘g‘li Umid Mirzayev ham borligi aniqlangan.

61 yoshli suxandonning qotili uning uyidagi shkaf ichiga yashirinib olgan. U Zangiota tumanining Chuvalachi qishlog‘ida istiqomat qiluvchi 21 yoshli Q. Shoazizov bo‘lgan. Prokuratura va ichki ishlar organlari tomonidan jinoyatchi qo‘lga olinib, voqea yuzasidan tergov ishi olib borildi. Dastlabki tergov davomida jinoyatga suxandonning o‘g‘li ham aloqador ekani aniqlandi.

Toshkent shahar jinoyat ishlar mahkamasi Qudrat Shoazizov va Umid Mirzayevni qotillikda aybdor deb topib, uzoq yillik qamoq jazolari belgilagan.

Qudrat Shoazizov 14 yilga, Rahmatilla Mirzayevning o‘g‘li Umid Mirzayev esa 18-yilga ozodlikdan mahrum etilgan.

Taniqli dizayner qotillik qurboni bo‘ldi

Toshkentlik taniqli dizayner va xoreograf Nariman Grigoryan qotillik qurboni bo‘lgan. U 35 yoshida o‘z xonadonida qotillik alomatlari bilan topilgan.

2020-yilning 14-yanvar kuni, soat 11:50 larda Yashnobod tumani IIO FMB navbatchilik qismiga hodisa to‘g‘risida xabar kelib tushgan. Unga ko‘ra, Yashnobod tumani, Chigil ko‘chasida joylashgan xonadonning mehmonxonasidan ushbu xonadonda ijarada istiqomat qilib kelgan 1985-yilda tug‘ilgan Nariman Grigoryanning murdasi qotillik alomatlari bilan topilgan.

Nariman Grigoryan — taniqli o‘zbek dizayneri, xoreografi, “Todes” guruhi birinchi tarkibining sobiq aʼzosi, xalqaro ko‘rgazmalar, tanlovlar va festivallar ishtirokchisi. 2004−2008-yillarda O‘zbekiston Xoreografiya akademiyasida tahsil olgan. U Toshkentda Nariman Grigoryan savdo belgisi ostidagi moda uylariga egalik qilgan.

Pichoqlangan sportchi Elbek Rahimov

Aralash kurash jangchisi Elbek Rahimov 2021-yilning 17-avgust kuni Qarshi shahrida bir guruh shaxslar tomonidan o‘ldirildi. O‘sha vaqtda sportchi bor-yo‘g‘i 31 yoshda edi.

Elbek Rahimovning ukasi Akmal Rahimov va Zuhriddin Boymirzayev orasida o‘zaro janjal kelib chiqadi. Elbek o‘z ukasining yonini olib, u yigit bilan kelishmovchilikka borgan.

Boymirzayev o‘ch olish maqsadida bir guruh yosh yigitlar bilan kelishib 17-avgust kuni ertalab 07:00 atrofida Qarshi shahridagi ko‘p qavatli uyning eshigi oldida Elbek Rahimovni kutib turishgan. Soat 09:35 lar atrofida Elbek Rahimov uydan chiqqan vaqt ko‘plab guvohlar oldida unga turli temir buyumlar va pichoq bilan tan jarohatlari yetkazishgan. So‘ng, jarohatlangan sportchini mashinaga ortib, Chiroqchi tumani tibbiyot birlashmasiga olib borishgan. Yetkazilgan tan jarohatlari natijasida Elbek Rahimov shifoxonada vafot etgan.

Samarqandlik xonanda eri tomonidan o‘ldirildi

Joriy yilning 26-iyul kuni Samarqand viloyatining Toyloq tumanida yashovchi Zebo ismli xonanda turmush o‘rtog‘i tomonidan o‘ldirildi. 

Aniqlanishicha, erkak ayolining oldiga farzandlarini ko‘rish maqsadida kelib, u bilan suhbat davomida o‘rtalarida kelib chiqqan kelishmovchilik oqibatida janjallashgan. Janjal vaqtida erkak turmush o‘rtog‘ini qo‘llari bilan bo‘g‘ib, o‘ldirgani ma’lum bo‘lgan.

Holat yuzasidan erkakka nisbatan Jinoyat kodeksining 97-moddasi (qasddan odam o‘ldirish) 1-qismi bilan jinoyat ishi qo‘zg‘atilgan. Gumonlanuvchi erkak ushlangan.