Farg‘ona viloyatidagi Qo‘qon davlat o‘rmon xo‘jaligida yashil boyliklar va hayvonot olami qo‘riqlanib, yangi o‘rmon va butazorlar barpo etilmoqda. 10 ming gektardan ortiq yer maydoniga ega xo‘jalikda mevali va manzarali daraxt ko‘chatlari yetishtirish ham yo‘lga qo‘yilgan. Bu haqda O‘zA xabar bermoqda.
Bu yerda o‘simliklarning yangi navlari ko‘paytirilib, mamlakatning turli hududlariga yetkazib berilmoqda. Xo‘jalikda yapon soforasi, kashtan, go‘zal katalpa, ipak akatsiya, qrim qarag‘ayi, lola daraxti kabi dunyoning turli hududlarida o‘sadigan noyob buta va daraxtlar ko‘paytirilmoqda.
— Xo‘jaligimizga qarashli 8 uchastkada dorivor va shifobaxsh o‘simliklar yetishtiriladi. Rishton uchastkasida 130 turdagi shifobaxsh o‘simliklar parvarish qilinmoqda, — deydi Qo‘qon davlat o‘rmon xo‘jaligi direktori M.Xo‘jayev. — Oshqovoq, achchiq bodom, jiyda, na’matak kabi o‘simliklar qo‘shimcha daromad keltirmoqda. Bu yerda tashkil etilgan “Vodiy o‘rmon farm” mas’uliyati cheklangan jamiyati tomonidan mazkur o‘simliklar qayta ishlanib, shifobaxsh dorilar ishlab chiqarilmoqda.
15 gektar maydonda pista parvarishlayotgan o‘rmon xo‘jaligi xodimlari pista daraxtini urug‘idan ko‘kartirib, ko‘paytirishni yo‘lga qo‘ygan. O‘tkazilayotgan monitoring ishlari jarayonida 10 yil ilgari o‘sgan bir qator noyob o‘simliklar o‘z-o‘zidan yo‘qolib ketgani aniqlandi. Xo‘jalik ishchilari olimlar bilan hamkorlikda ularni qaytadan tiklash ishlarini olib bormoqda. Begler va Fedchenko na’mataklari, mahalliy atirgullar shular jumlasidandir.
Yaqinda terakning yangi navi yaratildi. U sho‘rxok yerda yaxshi o‘sadi, yerning sho‘rini bartaraf etib, unumdorligini oshiradi. Unga olimlarimiz “Qo‘qon teragi” deb nom berdi.
Izoh (0)