Samarqandning yangi tramvayi qaysi ko‘chalardan o‘tadi?

O‘zbekiston Prezidenti vazifasini bajaruvchi, O‘zbekiston bosh vaziri Shavkat Mirziyoyev 5-oktabr kuni Samarqand viloyatiga tashrifi vaqtida viloyat markazida 2017-yil 21-martga qadar tramvay qatnovini yo‘lga qo‘yish haqida ko‘rsatma berdi.

Siyobdan Sartepaga

“O‘zbekiston” telekanalining “Axborot” ko‘rsatuvida ma’lum qilinishcha, Samarqand yangi tramvayning birinchi yo‘nalishi Siyob bozori va gavjum Sartepa (Sattepo) mavzesi oralig‘ida qatnaydi. Baxtga qarshi, yo‘l aynan qaysi ko‘chalardan o‘tishi haqida hozircha aniq axborot yo‘q, lekin taxmin qilish mumkin.

Masalan, “Yandeks.Karti” xarita servisiga murojaat qilinsa, Siyob bozoridan Sartepa mavzesi (aniqrog‘i, Sartepa parki)gacha bo‘lgan 7,6 kilometrlik (avtomobilda 17 daqiqada bosib o‘tish mumkin bo‘lgan) yo‘nalishni ko‘rish mumkin. Google Maps xarita servisi esa bozordan mavzega avtomobilda nisbatan qulay yetib olish mumkin bo‘lgan uchta yo‘lni chizib ko‘rsatadi.

Yo‘llardan biri bo‘lajak tramvay harakati uchun nisbatan maqbuldek ko‘rinadi: Imom al-Buxoriy ko‘chasidan yo‘lga chiqqan vagonlar Dahbed yo‘li orqali Registon ko‘chasiga chiqadi, Amir Temur haykali oldidagi aylanma yo‘ldan Bo‘stonsaroy ko‘chasiga buriladi, so‘ng Amir Temur ko‘chasiga chiqib, Turkiston ko‘chasi bilan chorrahaga qadar to‘g‘ri harakatlanadi — so‘ng Turkiston orqali Sartepa mavzesiga kirib keladi.

Google Maps’ning ma’lumotiga ko‘ra, mazkur harakat yo‘nalishi uzunligi 8,6 kilometrga teng, uni avtomobilda 18—22 daqiqada bosib o‘tish mumkin. Qo‘shimchasiga, ko‘rsatib o‘tilgan yo‘lning Siyob bozoridan Amir Temur — Lutfiy ko‘chalari kesishmasigacha bo‘lgan aksariyat qismida 1947—1973-yillarda tramvay ham harakatlangan.

Qayd etish joiz, Facebook’dagi “Samarqand va samarqandliklar” guruhi a’zolaridan biri yangi tramvay Universitet xiyobonidan o‘tishini taxmin qilgan. Lekin bu taxmin haqiqatdan uzoqdek ko‘rinadi — tramvayning ushbu salqin ko‘cha bo‘ylab harakatlanishi uchun xiyobondagi ko‘p yillik daraxtlarni kesishga to‘g‘ri keladi.

Samarqandning eski tramvayi qaysi ko‘chalardan o‘tardi?

Samarqandda 1947—1973-yillar oralig‘ida faoliyat ko‘rsatgan eski tramvay atigi bitta yo‘nalishdan iborat edi, u “Shahar temiryo‘l vokzali — Siyob bozori” qatnovi bo‘ylab yo‘lovchilarga xizmat ko‘rsatgan.

“O‘zbekiston elektrotransporti” sayti ma’lumotiga ko‘ra, Samarqandning eski tramvayi qurilishi rejalashtirilayotgan va shahar janubi tomon intiladigan bo‘lajak yo‘nalishning aksi bo‘lgan.

U hozirgi Imom al-Buxoriy ko‘chasidan yo‘lga chiqib, Dahbed yo‘lidan ozgina yurib, so‘ng hozirgi Ko‘ksaroy maydoniga burilgan, u yerdan Amir Temur ko‘chasiga kirib borib, Lutfiy ko‘chasiga qadar to‘g‘ri harakatlangan, yakunda Lutfiy ko‘chasi orqali Mirzo Ulug‘bek va Beruniy ko‘chalariga chiqib, shahar shimolidagi vokzalga yetib borgan.

Samarqandda qanday rusumdagi tramvaylar harakatlanadi?

Katta ehtimol bilan, Toshkentdagi tramvay faoliyatining tugatilishi bilan keraksizga aylangan, biroq deyarli yangi — 2011—2013-yillarda Chexiyadan olib kelingan Vario LF tramvaylari endi samarqandlik yo‘lovchilarning uzog‘ini yaqin qiladi.

“Vario”lardan tashqari, Toshkent tramvay parkining boshqa nisbatan yaxshi va soz holatdagi boshqa vagonlari ham Samarqandda paydo bo‘lishi mumkin.

Samarqandda faqat bitta tramvay yo‘nalishi bo‘ladimi?

O‘zAning yozishicha, Mirziyoyev bir emas, bir necha “zamonaviy tramvay liniyalari” haqida fikr bildirgan — kelajakda yo‘nalishlar soni ko‘payishi mumkin. Hozircha faqat bir narsa aniq — Samarqanddagi yangi tramvayning birinchi yo‘nalishi 2017-yilgi Navro‘z bayramida ochiladi.

• Qayta tug‘ilish: Samarqand tramvayi tarixi

• Foto: Samarqandning eski tramvayi

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.