Фарғона вилоятидаги Қўқон давлат ўрмон хўжалигида яшил бойликлар ва ҳайвонот олами қўриқланиб, янги ўрмон ва бутазорлар барпо этилмоқда. 10 минг гектардан ортиқ ер майдонига эга хўжаликда мевали ва манзарали дарахт кўчатлари етиштириш ҳам йўлга қўйилган. Бу ҳақда ЎзА хабар бермоқда.
Бу ерда ўсимликларнинг янги навлари кўпайтирилиб, мамлакатнинг турли ҳудудларига етказиб берилмоқда. Хўжаликда япон софораси, каштан, гўзал катальпа, ипак акация, қрим қарағайи, лола дарахти каби дунёнинг турли ҳудудларида ўсадиган ноёб бута ва дарахтлар кўпайтирилмоқда.
— Хўжалигимизга қарашли 8 участкада доривор ва шифобахш ўсимликлар етиштирилади. Риштон участкасида 130 турдаги шифобахш ўсимликлар парвариш қилинмоқда, — дейди Қўқон давлат ўрмон хўжалиги директори М.Хўжаев. — Ошқовоқ, аччиқ бодом, жийда, наъматак каби ўсимликлар қўшимча даромад келтирмоқда. Бу ерда ташкил этилган «Водий ўрмон фарм» масъулияти чекланган жамияти томонидан мазкур ўсимликлар қайта ишланиб, шифобахш дорилар ишлаб чиқарилмоқда.
15 гектар майдонда писта парваришлаётган ўрмон хўжалиги ходимлари писта дарахтини уруғидан кўкартириб, кўпайтиришни йўлга қўйган. Ўтказилаётган мониторинг ишлари жараёнида 10 йил илгари ўсган бир қатор ноёб ўсимликлар ўз-ўзидан йўқолиб кетгани аниқланди. Хўжалик ишчилари олимлар билан ҳамкорликда уларни қайтадан тиклаш ишларини олиб бормоқда. Беглер ва Федченко наъматаклари, маҳаллий атиргуллар шулар жумласидандир.
Яқинда теракнинг янги нави яратилди. У шўрхок ерда яхши ўсади, ернинг шўрини бартараф этиб, унумдорлигини оширади. Унга олимларимиз «Қўқон тераги» деб ном берди.
Изоҳ (0)