Rossiyaning Domodedovo aeroporti bojxona xizmati xodimlari Dubay—Moskva reysi yo‘lovchisi o‘z jomadonida olib o‘tmoqchi bo‘lgan 30 ta sudralib yuruvchini musodara qildi, deb yozadi “TASS” Federal bojxona xizmatiga tayanib.
Dubay—Moskva reysi bilan uchib kelgan 19 yoshli Rossiya fuqarosi jonivorlarni olib o‘tish huquqini beruvchi ruxsatnomani taqdim eta olmadi.
Yigitga tegishli jomadonda turli kattalikdagi 28 ta kaltakesak va ikkita ilon aniqlangan. Hayvonlar turli obyektlarni qidirib topishga o‘rgatilgan xizmat iti yordamida aniqlangan.
Yo‘lovchining so‘zlariga ko‘ra, u veterinariya fakulteti talabasi bo‘lib, jonivorlarni uyda boqish uchun Gonkongda sotib olgan.
Ayni paytda ilon va kaltakesaklar musodara qilinib, yovvoyi hayvonlar reabilitatsiyasi markaziga yo‘naltirilgan. Keyinroq ular ekspertizadan o‘tkaziladi va uning natijalariga ko‘ra ma’muriy yoki jinoiy ish qo‘zg‘ash masalasi hal etiladi.
Izoh (0)