Oliy Liga. “Paxtakor” ketma-ket ikkinchi Toshkent derbisida zafar quchdi, “Bunyodkor” ochko yo‘qotdi

Futbol bo‘yicha O‘zbekiston Oliy Ligasida 28-sentabr kuni 24-tur bellashuvlarining ikkitasi o‘z yakuniga yetdi.

Osiyo Chempionlar Ligasining chorak finaliga qadar yetib borgan va mamlakat chempionligi uchun eng yaqin bo‘lib turgan “Lokomotiv” poytaxt derbisida “Paxtakor”ga imkoniyatni boy berdi — 1:2. Mezbonlarning har ikki goliga Jaloliddin Masharipov mualliflik qilgan bo‘lsa, uning har ikki goliga golli uzatmani xorazmlik boshqa bir futbolchi Jamshid Iskandarov berdi.

“Temiryo‘lchilar” safidan hisobni qisqartiruvchi golga Sanjar Shoahmedov mualliflik qildi. Unga golli uzatmani Ikrom Aliboyev tashlab berdi.

Ma’lumot uchun, Toshkent derbisining “Lokomotiv” stadionida bo‘lib o‘tgan birinchi o‘yinida “temiryo‘lchilar” Temurxo‘ja Abduxoliqovning goli evaziga muvaffaqiyat qozongandi.

Ikki tur avval bo‘lib o‘tgan Toshkent derbisida “Paxtakor”dan yengilgan “Bunyodkor” esa Buxoroda ochko yo‘qotdi — 0:0. Qo‘lga kiritilgan bir ochko natijasida “qaldirg‘ochlar” peshqadam “Lokomotiv” bilan oradagi farqni 5 taga qadar qisqartirdi. Ketma-ket uch turda zafar quchgan “Paxtakor” esa 5-o‘ringa ko‘tarilib oldi.

30-sentabr kuni “Nasaf” o‘z maydonida “Metallurg”ni qabul qiladi. 24-turning qolgan besh uchrashuvi 1-oktabr kuni bo‘lib o‘tadi.

O‘zbekiston Oliy Ligasi 24-tur bellashuvlari 28-sentabr, chorshanba

“Paxtakor” — “Lokomotiv” 2:1

“Buxoro” — “Bunyodkor” 0:0

1-oktabr, shanba“Qo‘qon—1912” — “Navbahor”“Andijdon” — “Qizilqum”“Olmaliq” — “So‘g‘diyona”“Obod” — “Neftchi”“Sho‘rtan” — “Mash’al”