Ozarbayjon prezidenti Ilhom Aliyev 26-sentabr, dushanba kuni mamlakatda bo‘lib o‘tayotgan, konstitutsiyaga o‘zgartirishlar kiritish bo‘yicha referendumda ovoz berdi, deb yozadi “TASS”. U poytaxt markazidagi bir vaqtlar o‘zi ta’lim olgan o‘rta maktabda joylashgan uchastkada o‘z fuqarolik burchini bajardi.
Davlat rahbari bilan birgalikda uning rafiqasi Mehribon Aliyeva va oilaning boshqa a’zolari ham ovoz berdi. Prezident matbuot uchun hech qanday bayonot bermagan holda uchastkani tark etdi.
Byulletenga 29 ta band kiritilgan, ularning har biri taklif etilayotgan o‘zgartirish va qo‘shimchalarni aks ettiradi. Referendum ishtirokchilarining 50 foizdan ortiq ovozlarini to‘plagan tuzatishlar qabul qilindi, deb hisoblaniladi.
Referendumning borishini 117 nafar xalqaro va 53 mingga yaqin mahalliy kuzatuvchilar nazorat qiladi.
Referendumdan maqsad, hukumat vakillari so‘zlariga ko‘ra, davlat boshqaruvi tizimini takomillashtirish, xususan, mamlakat rahbariyatida yangi lavozimlarni ta’sis etish, prezident va parlament deputati bo‘lib saylanish uchun yosh cheklovlarini bekor qilish.
Izoh (0)