Shu yilning 23-sentabr kuni AQShning Mayami shahrida o‘tkazilgan turnirda ishtirok etgan o‘zbekistonlik bokschi Xurshidbek Normatov professional ringdagi ikkinchi g‘alabasiga erishdi. Bu haqda “Gazeta.uz” xabar bermoqda.
Amerikalik 26 yoshli Tomas Bernardga qarshi kechgan bahsda andijonlik bokschi ikkinchi raundda raqibini nokautga uchratdi.
Qayd etish kerakki, shu yilning 25-iyun kuni Xurshidbek Normatov professional ringdagi birinchi jangini o‘tkazib, Ramon Barberni mag‘lubiyatga uchratgandi. 25 yoshli o‘zbekistonlik bokschi Fight Promotion promouterlik kompaniyasi bilan 15 jangga shartnoma imzolagan.
Ma’lumot uchun, Xurshidbek Normatov 2010, 2011, 2013, 2014-yillarda O‘zbekiston chempioni bo‘lgan. 2013-yili Butunjahon Universiada o‘yinlarida kumush medalni qo‘lga kiritgan. Shuningdek, Normatov Butunjahon boks seriyasining (WSB) “Ukraina atamanlari” jamoasida ishtirok etib, Rio–2016 Olimpiada o‘yinlarining bo‘lajak sovrindori – meksikalik Misael Rodriges hamda ikki karra Olimpiada chempioni – kubalik Arlen Lopesni mag‘lub qilgan.
Izoh (0)