O‘zbekiston Ichki ishlar vazirligi tomonidan maktabgacha ta’lim muassasalari, maktablar, litsey va kollejlarda profilaktik ishlarni kuchaytirish maqsadida tashkil etilgan tadbir doirasida joylarda keng ko‘lamli ishlar amalga oshirilmoqda, deb xabar bermoqda O‘zA.
“Sohamiz xodimlari ta’lim muassasalarida bo‘lib, o‘quvchilar o‘rtasida yo‘llarda harakatlanish tartib-qoidalari haqida suhbatlar o‘tkazmoqda”, — deydi Buxoro viloyati IIB Yo‘l harakati xavfsizligi boshqarmasi boshlig‘i o‘rinbosari Karim Umarov.
Transport vositalari serqatnov bo‘lgan yo‘l va ko‘chalarda piyodalar o‘tish joylari yo‘l chiziqlari bilan belgilangan. Transport vositalari harakati tig‘iz vaqtlarda jamoatchi avtoinspektorlar, avtokorxonalarning harakat xavfsizligi muhandislari va haydovchilar tayyorlash o‘quv muassasalari vakillarining navbatchiligi tashkil etildi.
Buxoro shahri hududida joylashgan va xalqaro ahamiyatga ega avtomobil yo‘llari yoqasidagi umumta’lim maktablariga qatnovchi o‘quvchilarning harakat xavfsizligini ta’minlashda viloyat Yo‘l harakati xavfsizligi boshqarmasi hamda alohida yo‘l-patrul xizmati otryadlari hamkorlik qilmoqda.
Avtomobil yo‘llarida transport vositalari va piyodalar harakat xavfsizligini ta’minlash maqsadida joriy yilning o‘tgan davrida 420 dan ortiq yangi yo‘l belgisi o‘rnatilib, 900 ga yaqin yaroqsiz belgi almashtirildi.
“Diqqat, bolalar!” tadbiri davomida to‘planayotgan tajriba avtotransport vositalari va piyodalar harakat xavfsizligini ta’minlash va ularning bu boradagi mas’uliyatini yanada oshirishga xizmat qiladi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)