Pentagon IShID matbuot kotibi Abu Muhammad al-Adnoniy Suriyada AQSh harbiy-havo kuchlari aviazarbasi natijasida o‘ldirilganini ma’lum qildi. Bu haqdagi bayonot 12-sentabr, dushanba kuni vazirlik saytida joylashtirildi, deya xabar beradi “RBK”.
“Mudofaa vazirligi AQSh HHKning 30-avgustdagi IShID yuqori martabali yetakchisi Abu Muhammad al-Adnoniyga qaratilgan aniq zarbasi muvaffaqiyatli bo‘lganini tasdiqladi”, — deyiladi Pentagon rasmiy vakili Piter Kukning bayonotida.
Al-Adnoniyning Suriyada yo‘q qilingani haqida 30-avgustda ma’lum bo‘ldi. O‘sha kunning o‘zida Reuters Pentagon vakiliga tayanib, aviazarbani AQSh boshchiligidagi koalitsiya aviatsiyasi berganini bildirdi. Rossiya mudofaa vazirligi o‘z navbatida Al-Adnoniy Aleppo viloyatida Su-34 zarbasi natijasida o‘ldirilganini ma’lum qildi. Mudofaa sohasidagi amerikalik mansabdorlar esa bu xabarni “hazil” deb atadi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.