Moskva sobiq meri Yuriy Lujkovning rafiqasi Yelena Baturina Forbes jurnali versiyasiga ko‘ra Rossiyaning eng badavlat ayollari reytingida yana yetakchilik qildi. Bu haqda nashr saytida ma’lum qilindi.
Inteco Management kompaniyasi rahbarining boyligi 1,1 milliard dollarga baholanmoqda.
Yuqori o‘nlikning yangi ishtirokchilari orasida milliarderlarning sobiq rafiqalari, chunonchi, Dmitriy Ribolovlevning sobiq xotini Yelena (600 million dollar, ikkinchi o‘rin) va Roman Abramovichning sobiq xotini Irina (300 million dollar, oltinchi o‘rin) bor.
Top o‘ntalikka, shuningdek, Wildberries internet-do‘koni asoschisi Tatyana Bakalchuk (500 million dollar, uchinchi o‘rin), “Progress-Kapital” investitsiya kompaniyasi direktorlar kengashi a’zosi Olga Belyavseva (400 million dollar, to‘rtinchi o‘rin), “Sodrujestvo” kompaniyalar guruhi egasi Natalya Lutsenko (325 million dollar, beshinchi o‘rin) ham bor.
Reytingning yettinchi pog‘onasida Andrey Guryevning xayriya jamg‘armasi boshqaruvi a’zosi Yevgeniya Guryeva (260 million dollar), undan keyingi o‘rinda xuddi shu hajmdagi boylik bilan tennischi Mariya Sharapova, to‘qqizinchi pog‘onada esa InfoWatch kompaniyasi bosh direktori Natalya Kasperskaya (190 million dollar) joylashdi.
Yuqori o‘nlikka “Sibir” va “Globus” aviakompaniyalarining asosiy egasi Nataliya Fileva (190 million dollar) yakun yasadi.
Izoh (0)