Alp tog‘larining Fransiyadagi tizmalarida o‘tgan dam olish kunlari ekstremal sport turlari bilan shug‘ullangan besh kishi halok bo‘ldi. Bu haqda The Guardian manbalariga tayanib, “TASS” xabar bermoqda.
“Sportning ekstremal turlari uchun halokatli bo‘lgan dam olish kunlari ikki alpinist, parashyutchi, deltaplanchi va vingstyut (uchish kostyumi) uchuvchisini hayotdan olib ketdi”, — deyiladi gazeta xabarida.
13-avgust, shanba kuni Ansi ko‘li yaqinida ikki o‘rinli qurilmadan qulagan 49 yoshli deltaplan bo‘yicha murabbiy mazkur qayg‘uli ro‘yxatni boshlab berdi. Uning o‘quvchisi eson-omon qo‘nishga muvaffaq bo‘ldi. O‘sha kunning o‘zida 32 yoshli uchish kostyumi ishqibozi 2041 metr balandlikdagi Dan d’Arklyuza cho‘qqisidan sakragandan so‘ng halok bo‘ldi.
14-avgust, yakshanba kuni 34 va 37 yoshli ikki alpinist Meyj tog‘i (3984 metr) yonbag‘ridan pastga qulab, hayotdan ko‘z yumdi. Keyin esa qidiruv-qutqaruv xizmati xodimlari Shveysariya bilan chegara yaqinidagi Yuqori Savoyya departamentida 2072 metrli Buklon tog‘idan sakragan parashyutchining jasadiga duch keldi.
Izoh (0)