Angliyaning Kornuoll grafligidagi Tintagel qishlog‘i yaqinida britaniyalik arxeologlar eramizning VI asriga tegishli qasr qismlarini topdi, deya xabar bermoqda The Independent. Bu joy an’anaviy tarzda Qirol Artur haqidagi afsonalar bilan bog‘lanadi, manzildan uzoq bo‘lmagan joyda esa shu paytgacha XIII asr normann qasri parchalari aniqlangan edi, xolos.
Olimlar aniqlagan tarixiy buyumlar Angliyaning tarixiy personaji haqida shu paytgacha topilgan dalillarning eng ishonarlisidir.
Vino va zaytun yog‘i uchun mo‘ljallangan sopol va shisha idish bo‘laklari, shuningdek, likoplar va kichik stakanlar qadimda qasrda yashagan kishilar o‘sha vaqtdagi Britaniya jamiyatining yuqori tabaqasiga mansub bo‘lganligidan darak beradi.
Arxeologlar qalinligi qariyb bir metrlik devor qismlarini, shuningdek, zina va pol alomatlarini aniqladi. Qadimiy inshootlardan birining izlari topilgan hudud maydoni 44 kvadrat metrga teng. Saroyniki deb taxmin etilayotgan qoldiqlar eramizning V-VI asriga taalluqli.
Izoh (0)