Yaponiyaning Sagamixara shahridagi aqliy imkoniyati cheklangan odamlar uchun mo‘ljallangan muassasa sobiq xodimi, o‘tgan tunda 10 kishining o‘limiga sabab bo‘lgan qirg‘inni uyushtirishda gumonlanuvchi, narkotiklar qabul qilgan, deb yozadi “TASS” Kyodo agentligiga tayanib.
2016-yil fevralida u qon va siydik tahlilini topshirgan, u marixuana borligini ko‘rsatgan. 26 yoshli Satosi Uematsu muassasada uch yil ishlab, fevral oyida ba’zi “shaxsiy sabablar”ga ko‘ra ishdan bo‘shagan.
Pansionatga hujum tungi ikki yarimda (Toshkent vaqti bilan 25-iyul, 22:30) sodir bo‘ldi. Bu vaqtda u yerda sakkiz xodim va bir soqchi bo‘lgan. Shuningdek, binoda 18 dan 75 yoshgacha 150 kishi bo‘lgan bo‘lishi mumkin.
Dastlabki ma’lumotlarga ko‘ra, gumonlanuvchi muassasaga qora mashinada kelib, binoga derazani bolg‘a bilan urib sindirish orqali kirib olgan. O‘zi bilan uchta pichoq solingan sumkani olib kelgan. Avtomobildan esa qon izlari bo‘lgan skotch va plastik kishanlar topilgan.
Satosi Uematsu hujumdan taxminan bir soat o‘tib, politsiyaga aybdor sifatida borgan. U qotillikni amalga oshirishga urinish va binoga noqonuniy tarzda kirishda gumonlanib, hibsga olindi.
Izoh (0)