Rossiyalik foydalanuvchilar Pokemon Go o‘yinining xavfi haqida ogohlantirildi

Rossiyaning Aloqa, axborot texnologiyalari va ommaviy kommunikatsiyalar sohasidagi nazorat federal xizmati (“Roskomnadzor”) axborot xavfsizligi bilan shug‘ullanuvchi Proofpoint kompaniyasi tadqiqoti bilan bo‘lishdi, deb yozadi “Hi-tech.mail.ru”. Ular Android uchun Pokemon Go o‘yinining norasmiy versiyalarida viruslarni aniqladi.

Virtual pokemonlarni tutish mumkin bo‘lgan Pokemon Go o‘yinini ayni paytda rossiyaliklar rasman yuklab ololmaydi. Android foydalanuvchilari o‘yin kliyentini (apk-fayl) begona manbalardan yuklab olishga majbur. Bundan firibgarlar foydalanib, dasturlarga viruslarni joylamoqda.

Proofpoint kompaniyasi shunday dasturlardan birida DroidJack virusini aniqladi. U mobil smartfonni bloklab qo‘yishi va foydalanuvchining shaxsiy ma’lumotlarini qo‘lga kiritish imkonini berishi mumkin.

Avvalroq Google Play’da dovrug‘i chiqqan o‘yin—  Pokemon Go nomi ostida tarqalayotgan xavfli dasturlar aniqlangandi.