Россиялик фойдаланувчилар Pokemon Go ўйинининг хавфи ҳақида огоҳлантирилди

Россиянинг Алоқа, ахборот технологиялари ва оммавий коммуникациялар соҳасидаги назорат федерал хизмати («Роскомнадзор») ахборот хавфсизлиги билан шуғулланувчи Proofpoint компанияси тадқиқоти билан бўлишди, деб ёзади «Hi-tech.mail.ru». Улар Android учун Pokemon Go ўйинининг норасмий версияларида вирусларни аниқлади.

Виртуал покемонларни тутиш мумкин бўлган Pokemon Go ўйинини айни пайтда россияликлар расман юклаб ололмайди. Android фойдаланувчилари ўйин клиентини (apk-файл) бегона манбалардан юклаб олишга мажбур. Бундан фирибгарлар фойдаланиб, дастурларга вирусларни жойламоқда.

Proofpoint компанияси шундай дастурлардан бирида DroidJack вирусини аниқлади. У мобил смартфонни блоклаб қўйиши ва фойдаланувчининг шахсий маълумотларини қўлга киритиш имконини бериши мумкин.

Аввалроқ Google Play’да довруғи чиққан ўйин—  Pokemon Go номи остида тарқалаётган хавфли дастурлар аниқланганди.