O‘zbekiston milliy terma jamoasi Chexiyaning yettinchi jamoasiga qarshi maydonga tushadi

Samvel Babayan murabbiylik qilayotgan O‘zbekiston milliy terma jamoasi Chexiyaning “Yablonets” klubiga qarshi o‘rtoqlik o‘yinida maydonga tushadi.

Bellashuv terma jamoa futbolchilari yig‘in o‘tkazayotgan Avstriyaning Yenbax shahrida bo‘lib o‘tadi. 13-iyul kuni Toshkent vaqti bilan 21:00 da start oladigan uchrashuv haqida O‘FF rasmiy sayti o‘yin kuni ma’lumot berdi.

“Yablonets” Chexiya chempionatining 2015/16-yilgi mavsumini 7-o‘rinda yakunlagan. Klub ayni vaqtda 2016/17-yilgi mavsum uchun tayyorgarlik olib bormoqda.

6-iyul kuni start olgan Avstriya yig‘ini 21-iyulga qadar davom etadi. Avvalroq matbuotda O‘zbekiston milliy terma jamoasining “Borussiya Dortmund” (Germaniya) va “Ufa” (Rossiya) klublariga qarshi maydonga tushishi haqida xabarlar paydo bo‘lgandi.

Avstriya yig‘idan so‘ng Samvel Babayan boshchilik qilayotgan terma jamoani Iroqqa qarshi o‘yin kutib turibdi. Bellashuv 24-iyul kuni 19:00 da “Bunyodkor” stadionida boshlanadi. 24-avgust kuni esa shu stadionda va aynan shu vaqtda Yaman termasiga qarshi o‘yin bor.