Firibgarlar telefon raqamlarini qalbakilashtirishni o‘rgandi

Rossiyada firibgarlikning yangi turi aniqlandi, deb yozadi “Hi-tech.mail.ru”.

Yovuz niyatlilar IP-telefoniyadan foydalanib, telefon raqamlarini qalbakilashtirishni o‘rgandi. Shu tariqa, ular o‘zini bank koll-markazi xodimi sifatida tanishtirib, aldov yo‘li bilan foydalanuvchilarning shaxsiy ma’lumotlarini qo‘lga kiritishi mumkin.

Firibgarlar bepul e’lonlar saytida uzoq vaqtdan buyon mahsulotini sota olmayotgan kishilarni o‘lja sifatida tanlaydi. Ular unga mahsulot uchun oldindan to‘lov kiritishni taklif qiladi. Buning uchun sotuvchidan bank kartasining raqami, amal qilish muddati va CVC kodi kabi to‘liq ma’lumotlarni yuborishni so‘raydi. Shu tariqa, firibgarlar 3DSecure ikki faktorli avtorizatsiya bo‘lmagan servislarda xaridlar uchun to‘lash imkoniyatiga ega bo‘ladi.

Agar kishi ma’lumotlarni berishdan bosh tortsa, yovuz niyatlilar, hech bo‘lmaganda, karta raqamini qo‘lga kiritishga urinadi. So‘ng ular VoIP-shlyuz — telefonlarni tarmoqqa ulash uchun qurilmadan foydalanadi, u orqali har qanday raqamdan qo‘ng‘iroq qilish mumkin. Ushbu holda ular haqiqiy koll-markaz raqamidan qo‘ng‘iroq qilib, o‘zlarini bank xodimi deb tanishtiradi.

Qurbon haqidagi ma’lumotlarni qo‘lga kiritgach, firibgarlar haqiqiy bankka qo‘ng‘iroq qiladi, qurbonning ism-sharifi bilan o‘zini tanishtirib, tekshiruvdan o‘tadi. Shu tariqa, ular bank kartasidagi mablag‘larni olishi mumkin bo‘ladi.

Bunday firibgarlikdan texnik vositalar orqali himoyalanib bo‘lmaydi. Shunchaki ogoh bo‘ling va o‘z telefon raqamingizni alohida zarurat bo‘lmasa, oshkor etmang.