Россияда фирибгарликнинг янги тури аниқланди, деб ёзади «Hi-tech.mail.ru».
Ёвуз ниятлилар IP-телефониядан фойдаланиб, телефон рақамларини қалбакилаштиришни ўрганди. Шу тариқа, улар ўзини банк колл-маркази ходими сифатида таништириб, алдов йўли билан фойдаланувчиларнинг шахсий маълумотларини қўлга киритиши мумкин.
Фирибгарлар бепул эълонлар сайтида узоқ вақтдан буён маҳсулотини сота олмаётган кишиларни ўлжа сифатида танлайди. Улар унга маҳсулот учун олдиндан тўлов киритишни таклиф қилади. Бунинг учун сотувчидан банк картасининг рақами, амал қилиш муддати ва CVC коди каби тўлиқ маълумотларни юборишни сўрайди. Шу тариқа, фирибгарлар 3DSecure икки факторли авторизация бўлмаган сервисларда харидлар учун тўлаш имкониятига эга бўлади.
Агар киши маълумотларни беришдан бош тортса, ёвуз ниятлилар, ҳеч бўлмаганда, карта рақамини қўлга киритишга уринади. Сўнг улар VoIP-шлюз — телефонларни тармоққа улаш учун қурилмадан фойдаланади, у орқали ҳар қандай рақамдан қўнғироқ қилиш мумкин. Ушбу ҳолда улар ҳақиқий колл-марказ рақамидан қўнғироқ қилиб, ўзларини банк ходими деб таништиради.
Қурбон ҳақидаги маълумотларни қўлга киритгач, фирибгарлар ҳақиқий банкка қўнғироқ қилади, қурбоннинг исм-шарифи билан ўзини таништириб, текширувдан ўтади. Шу тариқа, улар банк картасидаги маблағларни олиши мумкин бўлади.
Бундай фирибгарликдан техник воситалар орқали ҳимояланиб бўлмайди. Шунчаки огоҳ бўлинг ва ўз телефон рақамингизни алоҳида зарурат бўлмаса, ошкор этманг.
Изоҳ (0)