Tojikiston prezidenti Emomali Rahmon Dushanbening Ismoil Somoniy tumanida mamlakatdagi eng yirik “Dushanbe mol” savdo markazini ochib berdi, deb yozadi “Dialog” nashri.
Tasdiqlangan loyiha hujjatlariga ko‘ra, obyekt narxi jami 110 million somoniy (taxminan 14 million dollar)ni tashkil etadi. Jumladan, qurilish va montaj ishlari 100 million, uskuna va boshqa materiallar 10 million somoniyga tushdi.
Mahalliy tadbirkorlar taklifiga binoan, Fransiyaning Schiever International kompaniyasi rahbariyati Tojikistonda Markaziy Osiyodagi birinchi “Ashan” gipermarketini ochdi. Ta’kidlanishicha, ushbu kompaniya dunyoga taniqli bo‘lib, dunyoning turli mamlakatlarida uch mingdan ortiq savdo markazlariga ega.
Gipermarket binosi to‘rt qavatli bo‘lib, birinchi qavatda 160 ta avtomobilga mo‘ljallangan yopiq turargoh, texnik xizmat xonalari, ombor, ishchi kabinetlar bor. Ikkinchi va uchinchi qavatlarda “Ashan” gipermarketi, bolalar, ayollar va erkaklar do‘konlari, zargarlik , poyabzal, texnika do‘konlari, sog‘lomlashtirish markazi, restoran va 11 ta fast-fud nuqtalari joylashgan. To‘rtinchi qavatda esa to‘rtta kinoteatr va tasviriy san’at ko‘rgazmasi bor.
Izoh (0)