26-iyun kuni dunyo OAVlari Yevroittifoqdan chiqish haqidagi referendumdan so‘ng Buyuk Britaniya aholisi darhol “Yevroittifoq nima?” — degan savolni Google qidiruv tizimida faollik bilan bera boshlagani haqida ma’lum qildi. Bu bilan ular saylovchilar o‘zlari qabul qilgan qarorning muhimligidan yaxshi xabardor emasligini nazarda tutdi. Ammo, sport sharhlovchisi Denni Peyj fikricha, bunday tahlillar uchun Google Trends’dan foydalanish orqali, OAVlar mushtariylarni ko‘pincha chalg‘itadi, deb yozadi TJournal.
Peyj ta’kidlashicha, so‘nggi yillarda tarmoq foydalanuvchilari nima qilsa va nimaga qiziqsa, deyarli barchasini Google’da qidiradi, shu tufayli so‘rovlarning ochiq statistikasi — Google Trends jurnalist va blogerlar tomonidan noto‘g‘ri ishlatiladi.
Masalan, 2012-yilda amerikalik siyosatchi Mitt Romni AQSh prezidentligiga saylovlarda mag‘lub bo‘lgach, internet foydalanuvchilari uning ism va familiyasini eng ko‘p qidira boshladi. Biroq, Peyj fikricha, shu tariqa ular u kimligini bilishga urinmagan, balki yutqazgan nomzod haqida so‘nggi ma’lumotlar va yangiliklarni olgan.
Aprel oyida The Washington Post, go‘yoki, ko‘plab amerikaliklar Garriyet Tabmen — hukumat 20 dollarlik kupyuraga portretini tushirmoqchi bo‘lgan, qullikka qarshi harakat qahramoni kimligini bilmasligi haqida yozdi. Nashr Google Trends ko‘rsatkichlariga tayandi, u yerda uning obrazini banknotlarda qo‘llash haqidagi e’londan so‘ng uning shaxsiyatiga qiziqish keskin oshib ketganini ko‘rish mumkin edi.
Ammo, aslida Tamben haqidagi so‘rovlarning keskin o‘sishi — kontekstdan yulib olingan ma’lumotdan boshqasi emas. 2004-yildan boshlab tuzilgan grafik esa umuman boshqacha ko‘rinishga ega.
Google Trends’dan noto‘g‘ri foydalanishning eng qo‘pol namunasi, Peyj fikricha, Buyuk Britaniyaning Yevroittifoqdan chiqishi bilan bog‘liq voqea bo‘ldi. The Washington Post britaniyaliklar Yevroittifoqdan chiqishi bilan, uning nimaligini Google’da qidirishga kirishdi, deb yozgan edi. Yangilikni dunyoning boshqa OAVlari ham undan olib tarqatdi, biroq, Peyj bunda gap bir necha ming kishi haqida bormoqda, deb hisoblaydi.
“Yevroittifoq nima?” so‘rovini “Taxtlar o‘yini” seriali va Yevro—2016 bilan bog‘liq so‘rovlar bilan taqqoslasak, mamlakat qanday tashkilotdan chiqayotganini tushunishga harakat qilayotgan britaniyaliklar soni futbol yoki ommabop serial qahramonlari taqdiridan tashvishda bo‘lganlardan ancha kamdir.
Izoh (0)