Yevroittifoq asoschilari bo‘lgan davlatlar Buyuk Britaniyaning ittifoqdan chiqishini tezlashtirish zarurligini bildirdi

Buyuk Britaniyaning Yevroittifoqdan chiqishini tezroq rasmiylashtirish lozim. Bu haqda Fransiya tashqi ishlar vaziri Jan-Mark Ero Berlinda ittifoq asoschilari bo‘lgan mamlakatlar tashqi siyosiy mahkamalari rahbarlari uchrashuvi yakunidan so‘ng ma’lum qildi, deya xabar berdi “Interfaks”.

“Mavhumlikka yo‘l qo‘ymaslik uchun ham jarayonni tezlashtirish kerak. Biroq bu qarorning Buyuk Britaniya uchun moliyaviy va siyosiy oqibatlari albatta bo‘ladi”, — deya ta’kidlagan Ero.

Germaniya tashqi ishlar vaziri Frank-Valter Shtaynmayer ham Buyuk Britaniyaning Yevroittifoqdan chiqishi masalasi tezroq hal etilishi zarurligini bildirdi.

Shu bilan birga, Lyuksemburg TIV rahbari Jan Asselborn ittifoqdan chiqish to‘g‘risidagi rasmiy so‘rov Buyuk Britaniya hukumati yoki parlamentidan kelib tushishi lozimligi, Bryussel bunga ta’sir o‘tkazolmasligini ta’kidladi.