Blue Origin kompaniyasi New Shepard kosmik kemasini yana bir marta sinovdan o‘tkazdi

Amerikaning Blue Origin kompaniyasi Texas shtatida New Shepard suborbital kosmik kemasini murakkablashtirilgan parvoz sinovlaridan o‘tkazdi, deb yozadi “TASS” kompaniya rasmiy vakillariga tayanib.

Qurilma ekipajsiz holatda BE-3 dvigateli yordamida taxminan 100 km balandlikka ko‘tarildi. Shundan so‘ng undan kapsula ajralib chiqdi, u ikkita parashyut bilan yerga tushdi. Bir pog‘onali New Shepard raketasi ham tormoz dvigatelini yoqib, vertikal holatda qo‘ndi.

Eslatib o‘tamiz, New Shepard 2015-yilning 23-noyabrida ilk bor parvoz qilib, Yer ustidan 100,5 km balandlikka ko‘tarilgan va vertikal qo‘nishni amalga oshirgan tarixdagi birinchi raketa bo‘lgandi.

Ikkinchi marta esa sinov Texasdagi poligonda 2016-yil 22-yanvarda amalga oshirilgan. O‘shanda New Shepard raketasi va kosmik kema 101,7 km yuqoriga uchgandi.

New Shepard’ni uchinchi marta 2-aprelda uchirishdi. Kema yer sathidan 103 kilometr balandlikkacha ko‘tarildi, so‘ngra cho‘lga yengilgina qo‘ndi.