AQSh mudofaa vazirligi rossiyalik hamkasblari bilan Suriyadagi vaziyat yuzasidan shoshilinch videokonferensiya o‘tkazdi. Bu haqda 18-iyun, shanba kuni Pentagon matbuot kotibi Piter Kuk ma’lum qildi, deb xabar beradi “Vedomosti”.
“Vidokonferensiya 16-iyun kuni Rossiya kuchlari tomonidan at-Tanfada IShIDga qarshi kurash olib borayotgan Suriya muxolifati kuchlariga aviazarbalar berilishini muhokama etish uchun o‘tkazildi. Mudofaa vazirligi vakillari muloqot chog‘ida hamkasblariga AQSh tegishli kanallar orqali bu haqda ogohlantirganidan so‘ng ham Rossiya mazkur hududni bombalashni davom ettirganini bildirdi”, — deb ta’kidladi Pentagon vakili.
CNN manbalariga ko‘ra, Rossiyaning Su-24 bombardimonchilari Iordaniya chegarasidan 10 kilometr uzoqda “Yangi Suriya armiyasi” tuzilmalari marralariga zarbalar bergan. Buning oqibatida AQSh tomonidan qo‘llab-quvvatlanadigan muxolifat kuchlarining bir necha a’zosi halok bo‘lgan.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)