Rossiyaning Yahudiy muxtor viloyatida noma’lum shaxs suv havzasi qirg‘og‘ida dam olayotganlarga qarata o‘q uzdi. Bu haqda tergov qo‘mitasining viloyat boshqarmasida ma’lum qilindi, deb xabar beradi “RBK”.
Hodisa 19-iyun, yakshanba kuni ertalab sodir bo‘ldi. Nikolayevka qishlog‘idagi suv havzasi qirg‘og‘ida bir necha oila va ikki nafar politsiyachi dam olayotgandi. Ulardan uzoq bo‘lmagan masofada mahalliy fuqaro baliq tutayotgandi. U va dam oluvchilar o‘rtasida yo‘qolgan rezina qayiq tufayli mojaro yuzaga kelgani taxmin qilinmoqda.
Erkak avtomobilida noma’lum tomonga yo‘l olib, ko‘p o‘tmay o‘qotar ov quroli bilan qaytdi. Shundan so‘ng u dam oluvchilarga qarata o‘q uzdi. Buning oqibatida bir kishi halok bo‘ldi, ikki politsiyachi jarohatlandi. Chaqiriq bo‘yicha voqea joyiga kelgan politsiya xodimlarining taslim bo‘lish haqidagi taklifidan keyin hujum uyushtirgan shaxs joniga qasd qildi.
Hozirda tezkor tergov guruhi ro‘y bergan hodisa tafsilotlarini o‘rganmoqda.
Izoh (0)