14-iyun, seshanba kuni ochiq yurakda operatsiyani o‘tkazgan Italiya sobiq bosh vaziri Silvio Berluskoni “ko‘ngildagidek holatda”. Bu haqda 15-iyun, chorshanba kuni matbuot anjumanida siyosatchini operatsiya qilgan professor Ottavio Alfyeri va Berluskonining shaxsiy shifokori Alberto Dzangrillo ma’lum qildi, deya xabar beradi “TASS”.
“Operatsiya risoladagidek, asoratlarsiz o‘tdi. Yurakning qon yo‘lini to‘suvchi qismini almashtirdik, hozir bu a’zoni sog‘lom deyishimiz mumkin. Shu bilan birga, salomatlikni tiklash jarayoni yakuniga yetganicha yo‘q”, — deya ta’kidlagan Alfyeri.
Dzangrilloning bildirishicha, bemordan 15-iyun kuni ertalab sun’iy nafas berish qurilmasi olingan. Operatsiyadan 12 soat o‘tib Berluskoni hamshira bilan mutoyiba qila boshlagan. Hozirda u shoshilinch terapiya bo‘linmasida, 16-iyun, payshanba kuni oddiy palataga o‘tkazilishi va bu yerda yana bir hafta bo‘lishi ko‘zda tutilgan. Qayta tiklanishga esa bir oy ketishi aytilmoqda.
Shaxsiy shifokor Berluskoniga jo‘shqin siyosiy faoliyatdan tiyilishni tavsiya qilgan.
Izoh (0)