Eron hukumati xalqaro sudga AQShga qarshi da’vo arizasini yo‘naltirdi va endi ishning sudda ko‘rilishini kuzatib boradi. Bu haqda Islom Respublikasi prezidenti Hasan Ruhoniy ma’lum qildi, deb yozadi “TASS”. Eron AQShni 2 milliard dollarni noqonuniy ravishda o‘g‘irlashda ayblamoqda.
“Biz Eron xalqining huquqlariga rioya qilinishini diqqat bilan kuzatamiz. Ushbu pul mablag‘lari Eron xalqiga tegishli. Ular ehtiyotsizlik tufayli amerikaliklar qo‘liga tushib qoldi, shundan so‘ng Amerika sudi ularni noqonuniy ravishda xatladi”, — dedi u. Prezident gap aynan qaysi sud haqida borayotganiga aniqlik kiritmadi.
Ruhoniyning so‘zlariga ko‘ra, Eronga ushbu pullar Livanda halok bo‘lgan amerikaliklarning oilalari ixtiyoriga berilishini aytishmoqda. “Bu amerikaliklar Livanda nima qildi? Bularning barchasiga Eronning qanday aloqasi bor? Biz jimjitlik saqlab o‘tirmoqchimasmiz va sud ishini natijaga erishilmagunicha davom ettirmoqchimiz”, — dedi Ruhoniy.
Shu yilning aprelida AQSh Oliy sudi Eron Markaziy bankining 2 milliard dollarni qaytarish so‘rovini rad etdi va mablag‘ni Bayrutda 1983-yilda halok bo‘lgan amerikaliklarning oilalariga yo‘naltirish haqida buyruq chiqardi.
Izoh (0)