Shanxayda Xitoyning qit’a qismidagi birinchi Disneyland ochildi

Xitoyning qit’a qismidagi birinchi Disneyland mavzuli bog‘i 16-iyun, payshanba kuni Shanxayda ochildi, deya xabar bermoqda “RIA Novosti”.

Rasmiy ochilish marosimi mahalliy vaqt bilan 12:00 (Toshkent vaqti bilan 9:00)da boshlandi. Ochilish marosimiga chiptalar 28-mart kuni sotuvga chiqqan bo‘lib, 20 daqiqa ichida sotilib ketgan. Shuningdek, ikki haftalik ochilish davri (16-iyundan 30-iyungacha) uchun chiptalar ham sotilib bo‘lgan.

Xitoy OAVlari yozishicha, aprel oyida bog‘ 23 kun davomida sinov rejimida ishlagan, bu paytda u yerga 960 ming kishi tashrif buyurgan. Bog‘ga har yili 15 milliongacha kishi kelishi mumkin.

Bu Xitoyning qit’a qismida ochilgan birinchi Disneyland’dir. Xitoyda yana bir Disneyland bog‘i bo‘lib, u Gonkong maxsus ma’muriy tumanida joylashgan. Shuningdek, bu Walt Disney kompaniyasining hisob bo‘yicha oltinchi Disneyland’idir. Bunday bog‘lar Gonkongdan tashqari, AQSh (Kaliforniya va Florida), Fransiya (Parij) va Yaponiya (Tokio)da ochilgan.