Nyu-Yorkda vaqtincha Muhammad Ali nomli ko‘cha paydo bo‘ldi

Nyu-York hukumati 33-ko‘chaga vaqtinchalik yaqinda vafot etgan taniqli bokschi Muhammad Ali nomini berdi, deb yozadi “Interfaks”.

Ushbu ko‘cha Nyu-Yorkning Manxetten tumanida, Ali sakkizta jangini o‘tkazgan “Medison Skver Garden” zali yaqinida joylashgan. Ko‘cha aynan qancha muddatga qayta nomlangani xabar qilinmayapti.

“Butun umri davomida u buyuklik unvonini qayta-qayta himoya qildi, bugun esa biz bu odamga shahrimizning qoq yuragida o‘z hurmatimizni izhor etmoqdamiz”, — dedi Nyu-York meri Bill de Blazio ko‘chaning qayta nomlanishi munosabati bilan tarqatgan bayonotida.

Eslatib o‘tamiz, 74 yoshli Muhammad Ali 3-iyun kuni Amerikaning Finiks shahridagi kasalxonalardan birida vafot etdi, u yerga bokschi nafas olish bilan bog‘liq muammolar tufayli yetkazilgan edi.

Bokschining dafn marosimi 10-iyun, juma kuni Kentukki shtati Luisvill shahrida o‘tkaziladi.