Maymun Keniyadagi keng ko‘lamli elektr ta’minotidagi uzilishga sabab bo‘ldi

7-iyun, seshanba kuni butun Keniya bo‘ylab elektr energiyasi yetkazib berilishi to‘xtab qolishiga maymun sabab bo‘ldi. Bu haqda Reuters manbalariga tayanib, “TASS” xabar bermoqda. 

“Maymun ‘Jitaru’ gidroelektrostansiyasi tomiga chiqib, transformatorga qulab tushgan va uning ishdan chiqishiga sabab bo‘lgan. Bu esa GESdagi boshqa qurilmalar zo‘riqish bilan ishlashi va 180 megavattdan oshiq yo‘qotishga, buning oqibatida umummilliy miqyosda elektr ta’minoti uzilishiga olib kelgan”, — deya ma’lum qilingan mamlakatdagi eng yirik KenGen (Kenya Electricity Generating Company) energetik kompaniyasi bayonotida. 

Kompaniya uning obyektlari yovvoyi hayvonlardan elektr to‘siqlar bilan ajratilganini ta’kidlab, mazkur “favqulodda holat”dan afsus bildirgan. Shuningdek, bunday hodisalar oldini olish uchun qo‘shimcha choralar ko‘rishga va’da bergan.