Yaponiya bosh vaziri Sindzo Abe AQSh prezidenti Barak Obamaga Okinavada amerikalik sobiq dengiz piyoda askari tomonidan yaponiyalik qizning o‘ldirilishi munosabati bilan norozilik bildirdi. Bu haqda hukumat rahbari G7 sammiti boshlanishi arafasida o‘tkazilgan AQSh prezidenti bilan uchrashuv yakunlariga bag‘ishlangan matbuot anjumanida ma’lum qildi, deya xabar beradi “TASS”.
“Prezident Obamaga norozilik bildirdim. Bu kechirib bo‘lmas jinoyat, u nafaqat Okinava, balki butun Yaponiyani larzaga soldi”, — deya ta’kidlagan Abe.
Okinava politsiyasi 19-may kuni shu yerda joylashgan AQSh harbiy-havo kuchlari bazasida ishlaydigan sobiq dengiz piyoda askari, 32 yoshli amerikalikni hibsga oldi. U aprel oyida yo‘qolib qolgan 20 yoshli yapon qizni o‘ldirganlikda gumon qilinmoqda.
Obama mazkur hodisa yuzasidan hamdardlik bildirdi va uning batafsil tekshiruvi olib borilishiga har tomonlama ko‘mak berilishiga va’da qildi.
Izoh (0)