Argentina sobiq prezidentlari Kristina Fernandes de Kirshner (2007—2015-yillar), Eduardo Dualde (2002—2003-yillar), Fernando de la Rua (1999—2001-yillar), Adolfo Rodriges Saa (2001-yil), Ramon Puerta (2001-yil) va Eduardo Kamanyo (2001—2003-yillar) sobiq davlat rahbari Karlos Menem (1998—1999-yillar) o‘g‘lining o‘limi haqidagi ish bo‘yicha guvohlik berish uchun chaqirildi, deb yozadi “TASS”. Tegishli qarorni 18-may kuni federal sudya chiqardi.
Qarorga ko‘ra, yozma shaklda guvohlik beradigan Fernandes de Kirshnerdan tashqari barcha sobiq prezidentlar iyun oyida sud qarshisida shaxsan namoyon bo‘lishi kerak. Bundan tashqari, so‘roqqa Argentina razvedkasining sobiq rahbarlari Federiko de Santibanyes va Ektor Ikasuriala ham chaqirildi.
Argentina sobiq rahbarlarini so‘roq qilish uchun chaqirish qarori o‘tgan hafta Menem sudda o‘g‘lining o‘limiga Livanning “Hizbulloh” guruhi aralashganini aytganidan so‘ng qabul qilindi. Bu haqda unga, go‘yoki, Argentinaning marhum tashqi ishlar vaziri Gido di Tella aytgan, u esa ushbu ma’lumotni diplomatik kanallari orqali olgan.
Sobiq prezidentning o‘g‘li boshqarayotgan vertolyot 1995-yil 15-martida San-Nikolos shahri yaqinida yerga qulab tushgan edi. Olgan shikastlanishlari tufayli kichik Karlos Menem kasalxonada jon berdi. Tergovning boshidayoq marhumning qarindoshlari aviahalokat suiqasd natijasida yuz berganini ta’kidlagan edi.
Izoh (0)