Аргентина собиқ президентлари Кристина Фернандес де Киршнер (2007—2015 йиллар), Эдуардо Дуальде (2002—2003 йиллар), Фернандо де ла Руа (1999—2001 йиллар), Адольфо Родригес Саа (2001 йил), Рамон Пуэрта (2001 йил) ва Эдуардо Каманьо (2001—2003 йиллар) собиқ давлат раҳбари Карлос Менем (1998—1999 йиллар) ўғлининг ўлими ҳақидаги иш бўйича гувоҳлик бериш учун чақирилди, деб ёзади «ТАСС». Тегишли қарорни 18 май куни федерал судья чиқарди.
Қарорга кўра, ёзма шаклда гувоҳлик берадиган Фернандес де Киршнердан ташқари барча собиқ президентлар июнь ойида суд қаршисида шахсан намоён бўлиши керак. Бундан ташқари, сўроққа Аргентина разведкасининг собиқ раҳбарлари Федерико де Сантибанес ва Эктор Икасуриала ҳам чақирилди.
Аргентина собиқ раҳбарларини сўроқ қилиш учун чақириш қарори ўтган ҳафта Менем судда ўғлининг ўлимига Ливаннинг «Ҳизбуллоҳ» гуруҳи аралашганини айтганидан сўнг қабул қилинди. Бу ҳақда унга, гўёки, Аргентинанинг марҳум ташқи ишлар вазири Гидо ди Телла айтган, у эса ушбу маълумотни дипломатик каналлари орқали олган.
Собиқ президентнинг ўғли бошқараётган вертолёт 1995 йил 15 мартида Сан-Николос шаҳри яқинида ерга қулаб тушган эди. Олган шикастланишлари туфайли кичик Карлос Менем касалхонада жон берди. Терговнинг бошидаёқ марҳумнинг қариндошлари авиаҳалокат суиқасд натижасида юз берганини таъкидлаган эди.
Изоҳ (0)