Internetda EgyptAir kompaniyasining halokatga uchragan A320 samolyoti uchuvchisi va styuardessasi suratlari paydo bo‘ldi, deya xabar bermoqda “Korrespondent.net”.
Rasmiy ma’lumotlarga ko‘ra, MS804 reysida uchgan havo kemasi komandiri, 36 yoshli Muhammad Said Ali Shokir 6275 soatlik, ikkinchi uchuvchi esa 2766 soatlik parvoz tajribasiga ega bo‘lgan.
Uchuvchilardan biri — Muhammad Mamduh Assemning do‘sti uning suratini Facebook’ka joylab, ekipaj taqdiri haqida rasmiy xabarlar e’lon qilinmagan bo‘lsa-da, u bilan vidolashdi.
Shuningdek, tarmoqda, go‘yoki, halokatga uchragan samolyot bortida bo‘lgan styuardessaning surati tarqalmoqda.
Parijdan Qohiraga uchayotgan samolyot Gretsiya havo hududiga kirgandan 20 daqiqa o‘tib, radarlardan g‘oyib bo‘lgan. MS804 reysi bortida 56 nafar yo‘lovchi (ulardan uch nafari bola) va o‘n nafar ekipaj a’zosi bo‘lgan. Ularning taqdiri hozircha noma’lum.
“Mayadin” telekanali EgyptAir aviakompaniyasidagi manbasiga tayanib samolyot O‘rtayer dengiziga qulaganini bildirdi.
Misr fuqarolik aviatsiyasi vazirligi EgyptAir kompaniyasining A320 samolyoti halokatga uchraganini rasman tasdiqladi.
Izoh (0)