O‘zbekistonda Microsoft Lumia 950 smartfoni sotuvga chiqdi, deb yozadi “Mobinfo.uz”. Lumia lineykasidagi so‘nggi flagman o‘zidan avvalgi smartfonlar xususiyatlarini o‘zida mujassamlashtirgan, ammo hajmi bo‘yicha sezilarli ravishda kattaroq bo‘lib, sifatli va qimmatbaho materiallardan yig‘ilgan.
Microsoft kompaniyasi Windows 10 Mobile mobil operatsion tizimida ishlovchi eng yangi Lumia 950 va 950 XL flagmanlarini 2015-yil oktabrda rasman taqdim etgan edi.
Lumia 950’ga 5,2 dyuymli va 2560×1440 pikselli displey, olti yadroli Snapdragon 808 protsessori, 20 megapikselli asosiy va 5 megapikselli old kamera, 32 GB doimiy va 3 GB tezkor xotira, 3000 mA/soat sig‘imli akkumulyator o‘rnatilgan.
Tezkorlik bilan quvvat olish funksiyasi smartfonni 30 daqiqada 50 foiz zaryadlash imkonini beradi. Flagmanda Windows Hello funksiyasi ham bo‘lib, u gadjetning egasini tanib olish uchun xizmat qiladi.
Toshkentdagi “Fleshka” savdo majmuasida Microsoft Lumia 950 2,7 million so‘mga sotilmoqda.
Ushbu qurilmani ko‘rsatilgan narxda sotib olishga “Daryo” nashri kafolat bermaydi. Qurilma va uning narxi haqidagi axborot faqat tanishish uchun taqdim etilgan.
Izoh (0)