Apple Alisher Usmonov investorlaridan biri bo‘lgan Uber’ning Xitoydagi raqobatchisiga 1 mlrd dollar sarmoya kiritdi

Apple Xitoyning Didi Chuxing taksi xizmatiga 1 milliard dollar investitsiya kiritdi. Bu haqda “RBK” xabar bermoqda.

Uber’ning Xitoydagi asosiy raqibi sanaladigan mazkur servisga kiritilgan jami investitsiyalar hajmi 25 milliard dollarga baholanmoqda, bu esa uni mamlakatdagi eng qimmat startaplardan biriga aylantiradi. Didi Chuxing kuniga 11 million qatnovni amalga oshiradi va butun Xitoy bo‘ylab 300 millionga yaqin mijozga xizmat qiladi.

Apple bosh direktori Tim Kukning fikricha, investitsiya kiritilishi kompaniyaga Xitoy bozorini chuqurroq o‘rganish imkonini beradi. Ekspertlarga ko‘ra esa, mazkur qadam iPhone sotilishi susayib borayotgan paytda Apple biznesning boshqa yo‘nalishlarini sinab ko‘rishga tayyor ekanligini anglatadi.

Ma’lumot uchun, Alisher Usmonov Uber taksi xizmatining investorlaridan biri hisoblanadi.