Klinton turmush o‘rtog‘ini iqtisodiyotni jonlantirish uchun mas’ul etib tayinlashga va’da berdi

AQSh prezidentligiga Demokratlar partiyasidan nomzod bo‘lishga da’vogar Hillari Klinton saylovlarda g‘olib chiqqan taqdirda turmush o‘rtog‘i, mamlakatning sobiq prezidenti Bill Klintonni iqtisodiyotni jonlantirish uchun mas’ul etib tayinlash niyatida. Bu haqda u Fort-Mitchellda (Kentukki shtati) tarafdorlari o‘rtasidagi chiqishi chog‘ida ma’lum qildi, deya xabar beradi “RBK”. 

“Turmush o‘rtog‘imni iqtisodiyotni jonlantirish uchun mas’ul etib tayinlamoqchiman. Xabaringiz bor, u buni qanday amalga oshirishni biladi”, — deya ta’kidlagan sobiq Davlat kotibi. 

Hillari Klinton saylovoldi kampaniyasi davomida oldinroq ham bu mavzuni tilga olgan. Jumladan, o‘tgan yili MSNBC telekanaliga bergan intervyusida “U ajoyib maslahatchi. Iqtisodiyot va yangi ish o‘rinlari yaratish haqida men gaplashishim mumkin bo‘lganlardan ham ko‘p narsalarni biladi”, deya e’tirof qilgandi.