AQShning The New York Times nashri Sochi–2014 qishki Olimpiada o‘yinlarining 15 nafar rossiyalik sovrindori doping qabul qilganligini ma’lum qildi, deb xabar bermoqda “TASS”. Avvalroq Rossiya Sport ishlari vaziri Vitaliy Mutko “TASS” bilan suhbatda amerikaliklar tomonidan chop etilgan ushbu material Rossiya sportiga qarshi navbatdagi axborot urushidan o‘zga narsa emasligini ta’kidlagan.
The New York Times nashri Moskva antidoping laboratoriyasining sobiq rahbari Grigoriy Rodchenkovga tayanib, shunday xulosaga kelgan. Uning so‘zlariga ko‘ra, rossiyalik sportchilarning uy Olimpiadasida g‘alabani ta’minlash uchun davlat tomonidan boshqarib kelingan va uzoq yillar davomida rejalashtirilgan o‘ziga xos “Doping dasturi” bo‘lgan.
The New York Times nashri “Doping dasturi”dan o‘rin olgan sportchilar ro‘yxatida bobsleychi Aleksandr Zubkov (2 ta oltin medal, Sochi–2014), chang‘ichi Aleksandr Legkov (oltin va kumush medallari), skeletonchi Aleksandr Tretyakov (oltin medal) va xokkey bo‘yicha Rossiya ayollar termasining barcha a’zolari (oltinchi o‘rin) nomlarini keltirgan.
Rodchenkovning aytishicha, Sochi–2014 Olimpiadasi davomida Rossiya Sport vazirligi vakillaridan biri har kuni tunda doping namunasi o‘zgartirilishi kerak bo‘lgan sportchilar ro‘yxatini yuborar edi. Uning so‘zlariga ko‘ra, Olimpiada davomida 100 ga yaqin doping namunalari o‘zgartirilgan. Shuningdek, Grigoriy Rodchenkov uchta taqiqlangan preparatdan tayyorlangan maxsus “kokteyl” tayyorlab, Sochi–2014 Olimpiadasida ishtirok etgan o‘nlab rossiyalik sportchilarga bergan.
Moskva antidoping laboratoriyasining sobiq rahbarining aytishicha, taqiqlangan preparatlar taqratgani uchun 2011-yilda unga nisbatan tergov ishi qo‘zg‘atildi. Shunga o‘xshash ish yuzasidan uning opasi aybdor deb topildi. Rodchenkov unga nisbatan qo‘zg‘atilgan tergov ishining yopilishi uning Sochi–2014 Olimpiadasida olib borgan faoliyati bilan bog‘liq ekanini ta’kidladi.
2015-yilda Butunjahon doping agentligi (WADA) mustaqil komissiya tomonidan ko‘plab antidoping qoidabuzarliklar aniqlanganidan so‘ng Moskva antidoping laboratoriyasi faoliyati to‘xtatilgan edi. Shundan keyin Grigoriy Rodchenkov iste’fo berib, Los-Anjelesga jo‘nab ketdi.
Izoh (0)