АҚШнинг The New York Times нашри Сочи–2014 қишки Олимпиада ўйинларининг 15 нафар россиялик совриндори допинг қабул қилганлигини маълум қилди, деб хабар бермоқда «ТАСС». Аввалроқ Россия Спорт ишлари вазири Виталий Мутко «ТАСС» билан суҳбатда америкаликлар томонидан чоп этилган ушбу материал Россия спортига қарши навбатдаги ахборот урушидан ўзга нарса эмаслигини таъкидлаган.
The New York Times нашри Москва антидопинг лабораториясининг собиқ раҳбари Григорий Родченковга таяниб, шундай хулосага келган. Унинг сўзларига кўра, россиялик спортчиларнинг уй Олимпиадасида ғалабани таъминлаш учун давлат томонидан бошқариб келинган ва узоқ йиллар давомида режалаштирилган ўзига хос «Допинг дастури» бўлган.
The New York Times нашри «Допинг дастури»дан ўрин олган спортчилар рўйхатида бобслейчи Александр Зубков (2 та олтин медаль, Сочи–2014), чанғичи Александр Легков (олтин ва кумуш медаллари), скелетончи Александр Третьяков (олтин медаль) ва хоккей бўйича Россия аёллар термасининг барча аъзолари (олтинчи ўрин) номларини келтирган.
Родченковнинг айтишича, Сочи–2014 Олимпиадаси давомида Россия Спорт вазирлиги вакилларидан бири ҳар куни тунда допинг намунаси ўзгартирилиши керак бўлган спортчилар рўйхатини юборар эди. Унинг сўзларига кўра, Олимпиада давомида 100 га яқин допинг намуналари ўзгартирилган. Шунингдек, Григорий Родченков учта тақиқланган препаратдан тайёрланган махсус «коктейль» тайёрлаб, Сочи–2014 Олимпиадасида иштирок этган ўнлаб россиялик спортчиларга берган.
Москва антидопинг лабораториясининг собиқ раҳбарининг айтишича, тақиқланган препаратлар тақратгани учун 2011 йилда унга нисбатан тергов иши қўзғатилди. Шунга ўхшаш иш юзасидан унинг опаси айбдор деб топилди. Родченков унга нисбатан қўзғатилган тергов ишининг ёпилиши унинг Сочи–2014 Олимпиадасида олиб борган фаолияти билан боғлиқ эканини таъкидлади.
2015 йилда Бутунжаҳон допинг агентлиги (WADA) мустақил комиссия томонидан кўплаб антидопинг қоидабузарликлар аниқланганидан сўнг Москва антидопинг лабораторияси фаолияти тўхтатилган эди. Шундан кейин Григорий Родченков истеъфо бериб, Лос-Анжелесга жўнаб кетди.
Изоҳ (0)