Xalqaro jinoyat sudi (XJS) tomonidan qidirilayotgan Sudan prezidenti Umar al-Bashir Uganda prezidentining inauguratsiyasiga yetib keldi. Uganda Xalqaro jinoyat sudiga a’zo ekanligi uchun uni hibsga olishi va Gaaga sudiga topshirishi lozim, deb xabar beradi “TASS”.
Sudan yangiliklar agentligining ma’lum qilishicha, al-Bashir prezident Yoveri Musevenining inauguratsiyasiga ikki kunlik tashrif bilan kelgan.
2009 va 2010-yillarda XJS insoniyatga qarshi jinoyatlarda ayblanayotgan al-Bashirni hibsga olish uchun ikkita order bergan. Shundan buyon bu Sudan prezidentining Ugandaga birinchi tashrifidir. O‘tgan yili Museveni Xartumga tashrif buyurgan edi.
Huquqni himoya qiluvchi Xalqaro amnistiya tashkiloti Uganda hukumatini zudlik bilan al-Bashirni hibsga olishga chaqirdi.
“Rim statutiga (XJSni ta’sis etgan) a’zo mamlakat sifatida Uganda uni sudga topshirishi kerak”, — deyiladi bayonotda.
Izoh (0)