Venesuela prezidenti vakolatlari tugatilishi bo‘yicha referendum uchun keragidan 10 barobar ko‘p imzo to‘plandi

Venesuela prezidenti Nikolas Maduro vakolatlari muddatidan avval tugatilishi yuzasidan referendum o‘tkazilishi uchun bir kun ichida qonun talab etganidan 10 barobar ko‘p imzo to‘plandi. Bu haqda Miranda shtati gubernatori, mamlakat muxolifatining taniqli vakili Enrike Kapriles ma’lum qildi, deya xabar beradi “TASS”. 

“Bizda salkam 2 million imzo, aslida 196 ming kerak edi. Boshqa kerak bo‘lmaydi!”— deya yozgan siyosatchi Twitter’dagi sahifasida. 

Mamlakat konstitutsiyasiga ko‘ra, davlat arbobi saylangan muddatning yarmi o‘tgach, uni chaqirtirib olish yuzasidan referendum o‘tkazilishi mumkin. Uning tashkilotchilari Milliy saylov kengashiga birinchi bosqichda saylov huquqiga ega fuqarolarning bir foizi (200 ming kishi atrofida) imzosi qo‘yilgan talabnomani taqdim etishi lozim. Bir necha jarayonlardan so‘ng referendum tashkilotchilari atigi bir necha kun mobaynida endi 20 foiz saylovchi, ya’ni taxminan 4 million kishini imzosini yig‘ishi talab etiladi. 

Prezident Maduro referendum qo‘llab-quvvatlangan har bir imzoni tekshirib ko‘rish bo‘yicha ko‘rsatma bergan va buning uchun Xalq kongressi, partiyalar vakillaridan iborat maxsus guruh tashkil etilgan.