Chikago (AQSh, Illinoys shtati) rasmiylari politsiyada hibsda ushlab turilishi vaqtida olamdan o‘tgan ikki nafar qora tanli o‘smirning oilalariga 6,45 million dollar tovon to‘laydi. Shahar kengashi o‘smirlarning yaqinlari talablarini inobatga olish va ishni sudgacha hal etish uchun yakdillik bilan shunday qaror qabul qildi, deb xabar berdi “TASS”.
Politsiyachilar kameradan olib chiqib, elektroshoker bilan bir necha bor zarba bergan Filip Kolmanning oilasi 4,95 million dollar oladigan bo‘ldi. Uning o‘limiga shifokor politsiya bo‘limida bergan tinchlantiruvchi dorini organizm qabul qilmasligi sabab bo‘lgandi. Jastin Kukning yaqinlariga 1,5 million dollar beriladi. Uni qo‘lga olgan politsiyachilar nafas qisishi kasali bo‘lgan o‘smirga ingalyator bermagani uchun u hibsda astma xurujidan o‘lgandi.
Chikagoda bunday hodisalarning ko‘paygani ko‘p ming kishilik norozilik namoyishlariga olib keldi. Shahar meri Rem Emanuel Chikago politsiyasi rahbarini lavozimidan ozod qildi va huquq-tartibot idoralarida islohot o‘tkazishga va’da berdi.
Izoh (0)