Mossack Fonseca kompaniyasi 13-aprel, chorshanba kuni dunyo matbuotida ofshor firmalariga tegishli ichki hujjatlari chop etilishi bilan bog‘liq shov-shuvni tekshirishda Panama hukumati bilan hamkorlik qilishga tayyorligini bildirdi, deb yozadi “TASS”.
“Biz savollar tug‘ilganida va qo‘shimcha axborotga ehtiyoj sezilganida, tegishli hukumatlar bilan turli yurisdiksiyalarda faol hamkorlik bo‘yicha katta tajribaga egamiz, va shubhali faoliyat aniqlanganida, ko‘p hollarda biz o‘z tashabbusimiz bilan aloqaga chiqamiz”, — deyiladi kompaniya bayonotida.
“Biz biznes yuritib kelayotgan qariyb 40 yil davomida bo‘lgani kabi, hukumat bilan uning so‘nggi tekshiruvida yana hamkorlik qilib, vaziyatni oxirigacha olib borish uchun tayyorligimizni bildiramiz”, — dedi Mossack Fonseca.
Ma’lumot uchun, Mossack Fonseca kompaniyasi ma’lumotlar bazasidan axborot chiqib ketishi natijasida OAVlarda qator dunyo yetakchilari va ularning yaqinlari pul yuvish va soliqlardan bosh tortish bo‘yicha sxemalarga aloqadorligi haqida ma’lumot paydo bo‘lgan edi. Kompaniya faoliyati Jurnalistlik tekshiruvlari xalqaro konsorsiumi (ICIJ) tomonidan o‘rganilmoqda, bunga konsorsium qo‘lga kiritgan kompaniyaning 11,5 millionga yaqin hujjati asos bo‘lgan. Ularda 12 nafar sobiq va amaldagi davlat yetakchilari, Forbes ro‘yxatidagi 29 nafar milliarder, shuningdek, kino va sport yulduzlari nomlari keltirilgan.
Avvalroq Salvador rasmiylari Panamaning Mossack Fonseca yuridik kompaniyasi ofisida reyd o‘tkazib, hujjatlar hamda qurilmalarni musodara qilgan edi.
Izoh (0)