Facebook’ning sobiq prezidenti saratonga qarshi kurash uslublarini o‘rganish uchun 250 mln dollar ajratdi

Napster tarmog‘i asoschilaridan biri va Facebook’ning sobiq prezidenti Shon Parker o‘zining The Parker Foundation fondi orqali saraton immunoterapiyasi sohasidagi tadqiqotlar uchun 250 million dollar ajratdi. Mazkur uslub inson organizmi immun tizimidan o‘simtaga qarshi kurashda foydalanishga imkon beradi, deya xabar beradi “RBK”. 

Mablag‘ AQShdagi saraton kasalliklarini o‘rganish bilan shug‘ullanuvchi oltita yetakchi markaz faoliyatida ishtirok etadigan ilmiy institutni moliyalashtirish uchun ajratildi. Institut Parker Institute for Cancer Immunotherapy deya nom oladi va San-Fransiskodagi Kaliforniya universitetida joylashadi.

2004—2005-yillarda Facebook’ni boshqargan Shon Parkerning davlati Forbes tomonidan 2,4 milliard dollarga baholangan. U 2015-yil iyunida The Parker Foundation xayriya fondiga asos solgan va uning hisob raqamiga 600 million dollar o‘tkazib bergandi.