Чикагода полиция тутқунлигида оламдан ўтган қора танли ўсмирларнинг оилаларига 6,45 млн доллар товон тўланади

Чикаго (АҚШ, Иллинойс штати) расмийлари полицияда ҳибсда ушлаб турилиши вақтида оламдан ўтган икки нафар қора танли ўсмирнинг оилаларига 6,45 миллион доллар товон тўлайди. Шаҳар кенгаши ўсмирларнинг яқинлари талабларини инобатга олиш ва ишни судгача ҳал этиш учун якдиллик билан шундай қарор қабул қилди, деб хабар берди «ТАСС». 

Полициячилар камерадан олиб чиқиб, электрошокер билан бир неча бор зарба берган Филип Колманнинг оиласи 4,95 миллион доллар оладиган бўлди. Унинг ўлимига шифокор полиция бўлимида берган тинчлантирувчи дорини организм қабул қилмаслиги сабаб бўлганди. Жастин Кукнинг яқинларига 1,5 миллион доллар берилади. Уни қўлга олган полициячилар нафас қисиши касали бўлган ўсмирга ингалятор бермагани учун у ҳибсда астма хуружидан ўлганди.

Чикагода бундай ҳодисаларнинг кўпайгани кўп минг кишилик норозилик намойишларига олиб келди. Шаҳар мэри Рэм Эмануэль Чикаго полицияси раҳбарини лавозимидан озод қилди ва ҳуқуқ-тартибот идораларида ислоҳот ўтказишга ваъда берди.