Rossiya Milliy gvardiyasi xizmatchilariga alohida vaziyatlarda ogohlantirishsiz o‘q uzishga ruxsat beriladi

Milliy gvardiya xizmatchilari alohida vaziyatlar — fuqarolar yoki ularning o‘ziga xavf tug‘ilgan taqdirda ogohlantirishsiz kuch va qurol ishlatishi mumkin. Rossiya Davlat dumasiga prezidentdan kelib tushgan qonun loyihasida shu haqda bildirilgan, deya xabar beradi “Vedomosti”. 

Qurolli qarshilik ko‘rsatmagan, boshqa fuqarolar hayotiga xavf soluvchi yoki fuqarolar ko‘plab to‘plangan joylarga hujum uyushtirmagan taqdirda, homilador ayollar va nogironlar bundan istisno bo‘lishi mumkin. 

“Milliy gvardiya harbiy xizmatchisi qo‘llash kechikkan taqdirda fuqaro yoki harbiy xizmatchining o‘zini hayoti va salomatligiga xavf tug‘ilgan taqdirda, jismoniy kuch, maxsus vosita yoki o‘qotar quroldan foydalanish niyati haqida ogohlantirmaslik huquqiga ega”, — deyiladi qonun loyihasi matnida. Boshqa holatlarda gvardiyachi bu haqda ogohlantirishi shart. 

Shuningdek, loyihada Milliy gvardiya harbiy xizmatchisi mudofaa uchun yoki shunga zarurat tug‘ilgan taqdirda maxsus vositalar, o‘qotar quroli bo‘lmasa, qo‘li ostidagi istalgan vositadan foydalanish huquqiga ega ekanligi ta’kidlangan. Milliy gvardiya jangchilari ommaviy tartibsizliklarga chek qo‘yish uchun maxsus vositalarni ham qo‘llashi mumkin.

Eslatib o‘tamiz, oldinroq Vladimir Putin Rossiyada prezidentga to‘g‘ridan-to‘g‘ri bo‘ysunadigan Milliy gvardiya tuzilishini e’lon qilganligi haqida xabar berilgandi.