Kuchli jala Fijida keng ko‘lamli toshqinlarni keltirib chiqardi

So‘nggi kunlarda Fijida kuchli jala kuzatilmoqda, deb yozadi “TASS”. U yerga fevral oxirida “Uinston” tropik sikloni yopirilgan edi.

Mahalliy OAVlar xabariga ko‘ra, bir necha kundan beri davom etayotgan sharros yomg‘ir arxipelagning ko‘plab orollarida, jumladan, mamlakat aholisining uchdan ikki qismi yashaydigan eng yirik Viti-Levu orolida ham katta ko‘lamli suv toshqinlarini keltirib chiqargan. Ayniqsa og‘ir vaziyat Fiji xalqaro aeroporti joylashgan Nadi shahrida yuzaga keldi.

Hukumat 5-aprel kuni pastlikdagi tumanlarda joylashgan shahar va qishloqlar aholisi uchun bir necha o‘nlab evakuatsiya markazlari ochilganini e’lon qildi. Meteorologlar prognoziga ko‘ra, jala yana kamida bir kecha-kunduz davom etadi.