Armaniston Bokuning tahdidlariga javoban “mos zarba” berishni va’da qildi

Armaniston mudofaa vazirligi matbuot kotibi Arsrun Ovannisyan ma’lum qilishicha, agar Ozarbayjon tan olinmagan Tog‘li Qorabog‘ni o‘qqa tutishni bas qilmasa, mamlakat “mos ravishda javob zarbasi”ni beradi. Bu haqda “Gazeta.ru” xabar bermoqda.

“Ozarbayjon mudofaa vazirining buyrug‘i Bokudagilar Qorabog‘da jangovar harakatlar olib borilayotganini endigina tushunganini bildiradi, xolos. Ammo Ozarbayjondagilar Armaniston tomoni yanada kuchliroq javob zarbasini berishini bilishi kerak”, — dedi Ovannisyan.

Uning qo‘shimcha qilishicha, mudofaa vazirining birinchi o‘rinbosari Yevropada xavfsizlik va hamkorlik tashkilotining amaldagi raisining shaxsiy vakilini Bokuning tahdidlari haqida xabardor qilgan.

Eslatib o‘tamiz, avvalroq Ozarbayjon mudofaa vaziri Zakir Gasanov qurolli kuchlarga tan olinmagan Tog‘li Qorabog‘ Respublikasi poytaxti — Stepanakertga zarba berishga tayyorlanishni buyurgan edi.