Armaniston prezidenti Tog‘li Qorabog‘dagi keng ko‘lamli urush xavfidan ogohlantirdi

Tog‘li Qorabog‘da jangovar harakatlarning davom etishi keng ko‘lamli urushga aylanib ketishi mumkin. Bu haqda Armaniston prezidenti Serj Sargsyan YeXHT davlatlari elchilari bilan uchrashuv chog‘ida ma’lum qildi, deya xabar beradi “RBK”.

“Harbiy harakatlarning avj olishi ko‘zda tutilmagan va qaytarib bo‘lmas oqibatlar, xususan, keng ko‘lamli urushgacha olib kelishi mumkin. Bu nafaqat Janubiy Kavkaz, balki Yevropa mintaqasi xavfsizlik va barqarorligiga ham taalluqli”, — deya ta’kidlagan Sargsyan.

Prezident Yerevan vaziyatni tartibga solish uchun murosaga tayyor ekanligi, biroq “jangovar harakatlar davom etib, keng ko‘lamli ko‘rinish olgan taqdirda Armaniston Tog‘li Qorabog‘ respublikasi mustaqilligini tan olishi” haqida ogohlantirdi.